Tankar omkring næringsutviklinga i Drangedal

Det er elgjakt og fine dagar i skauen. Det betyr å sitte på post, og mykje venting. Spesielt mykje venting blir det når det er lite elg.
Det positive er at ein har tid til å tenke på mangt og mykje. Om alt er like lurt er så sin sak, men det kan nå hende at det kjem fram eit og anna det er verd å dele med andre.
I Drangedalsposten for vel ei veke sidan vart det varsla gjennomgang av Næringsselskapet i kommunen. Sikkert ikkje dumt det, det kan vere smart å målrette arbeidet på ein meir effektiv måte.
Eg vil nå likevel meine at ikkje berre Næringsselskapet bør settast under lupa, ein bør sjå på korleis heile det næringspolitiske arbeidet blir drive. Før valet stilte eg spørsmålet om kva nytte Drangedal har av medlemskapen i Vekst i Grenland. Eg skreiv at det er ein måte å akseptere at me er ein utkant og akseptere at vi skal vere ein pendlar- og sovekommune for Grenland. Dessutan at det er ein defensiv måte å møte trongen for næringsutvikling og arbeidsplassar på.
Vekst i Grenland har visjonen at regionen skal bli blant dei fem viktigaste i landet i 2025. Konkret heiter det at dei vil bli:
•Av dei viktigaste byregionane i Noreg, med storbyens tiltrekningskraft og småbyens kvalitetar
•Mest føretrekte industrivertskapet i Nord-Europa
•Av regionane med høgast grad av innovasjon innan miljø/energi, IKT og helse i Noreg
•Mest føretrekte utdanningsstadene i Noreg
•Av regionane i Noreg med best offentlig tilrettelegging for næringslivet
Det er lite bygdeutvikling her, og eg les lite som peikar mot ei utvikling av kommunen og næringslivet i Drangedal.
Kvart år blir dei mest næringsvenlege kommunane i Noreg kåra av ulike organisasjonar og tidsskrift.  Det dei beste kommunane sjølv legg vekt på, når dei kårast som dei beste er ofte:
•Gode rammevilkår, med  utvikling av fibernett, lån og tiskotsordningar for etablering og rimeleg straum
•Utbygging av kommunale tenester og kultur- og fritidstilbod for å framstå som en attraktiv bu-kommune, inkludert ein god vegstandard
•Heile tida ha eigna lokale til dei som ønskjer å etablere seg, og aktivt utvikle prosjekt innan blant anna reiseliv, landbruk og kultur.
•Tett dialog med næringslivet og eit aktiv og pågåande arbeid mot kapital- og næringsaktørar
Ved å ta tak i desse momenta og utvikle dei vidare, og ha tolmod så vil eg tru at ein få resultat. Kommunen har noko på gang her, men det gjeld å intensivere og målrette arbeidet.
Det trengs ein næringsavdeling/-kontor i kommunen som arbeider med kommunens eiga utvikling.
Ein underleg ting i Drangedal er at landbruk er skilt/definert ut og ikkje ein del av Næringsselskapets verkeområdet, i beste fall kan det sjå ut som om ansvarsdelinga er svært uklår. Det ligg så langt eg kan sjå (i følgje nettsidene) under Natur og miljø og her heiter det Jord- og skogforvaltning, ikkje utvikling og vekst innan landbruket. Det er underleg sidan mykje av veksten og nyetableringane faktisk har knyting til dette området.
All næringsutvikling må slik eg ser det samlast under ein paraply, med eit eintydig ansvar.
Tilbake til artikkelen i avisa 22.9. Jostein Harm rosar Vekst i Grenland for forståing for Drangedal sitt behov. Farmen og Jenter på hjul var positive tiltak, men skapar ikkje utan vidare lite varige arbeidsplassar, det hører vel helst til i ein marknadsplan.
Skal det bli meir aktivitet og arbeidsplassar i kommunen trengs meir enn forståing, det trengs aktiv handling.

 Åse 22.9.2011
 Hans Magne Gautefall