Alternative vegar

Felland skriv i klaga at vegløysing og nedbygging av strandsona må endrast.
Vegsituasjonen er uavklara i planen, og det pågår no ei jordskiftesak for å finne ei vegløysing i området. 9. februar skal det vere eit rettsmøte for å avgjere vegretten til naboane til hyttefeltet. Felland skriv at det er spesielt at kommunen ikkje kan vente på vegløysinga til jordskifteretten før den vedtek ein plan, og at noverande tenkt vegløysing vil føre til stor ulempe for landbrukseigedomen til Thor Wraa.

Unngå nabokonflikt

–Det er viktig at ting skjer på riktig måte og i riktig rekkefølgje. Slik kan utbyggjinga bli noko positivt også for naboane. Det er til alle sitt beste å hindre konfliktar, seier Thor Wraa til Drangedalsposten. Han understrekar at det er foreslått tre alternative vegløysingar mot det planlagte hytteområdet, og at det difor burde vere mogleg å finne ein veg alle kan einast om.

Stort grustak

Den vedteke reguleringsplanen inneheld dessutan eit stort grustak. Grustaket blir etter planen på 37,7 daa, og det vil verte teke i ti meters høgde. I klaga heiter det at kommunen ikkje har vurdert dette som massetak, fordi det skal brukast til hyttefeltet. Det er likevel slik at det vil vere trong for under ti prosent av massa til hyttefeltet. Utbyggjar skriv sjølv at det vil vere nok masse til minst fem hyttefelt på denne storleiken. Utkøyring av massen vil gå rett ved tunet til Thor Wraa, og i klaga heiter det at dette vil vere til stor ulempe for han.
Advokaten peiker på at kommunen ikkje har vurdert dette, men berre lagt til grunn at dette skal vere i bruk i hyttefeltet. Felland meiner dette er ei for slett vurdering av regulering av eit så stort massetak.

Friareal

Klaga gjeld dessutan at det ikkje er teke omsyn til at Wraa vil bli friarealleverandør for hyttefelta til både Bråthen og Hassel. Dette blir ein realitet og ein konsekvens for ein landbrukseigedom som ikkje er ein del av planen, og som Wraa krever at må utgreiast.

Formannskapet i februar

Klaga frå Olav Felland og Thor Wraa vil bli handsama under formannskapet i februar. Her vil det bli avgjort om klaga blir teke til følgje eller ikkje.
Peter Köller, leiar i sektor for teknikk, landbruk og kultur, seier det ikkje er uvanleg at det kjem slike klager i hytteutbyggjingssaker.
–Det er tidlegare blitt foreslått fleire vegtrasear, og vegsaken i området er enno ikkje avklara, seier Köller. Ut over det ynskjer han ikkje å kommentere saka.