Skagerak Kraft sponsar Tokedølen: – Det blir ny sesong
I sommar bad Jens Erik Rudlang Skagerak Kraft redde drifta av Tokedølen II. Grunna liten vasstand var inntektene til den stilleståande passasjerbåten lik null. Nå har regulanten strekt ut ei hand.
På grunn av den låge vasstanden i Toke låg Tokedølen II til kai heile den vanlegvis travle sommaren der passasjerbåten skulle henta inn inntekter. Styreleiar i Tokedølen AS Jens Erik Rudlang skreiv då eit brev til Skagerak Kraft der han bad om 200 000 kroner i sponsormidlar for å sikre neste års drift på Toke. Nå har Rudlang gode nyheiter.
– Det blir ny sesong neste år. Drangedølane vil sjå Tokedølen II putre rundt på Toke, seier han.
Artikkelen fortsetter under annonsen.
Blir sponsa med 150 000 kroner
Rudlang har sidan sommaren sendt fleire brev til Skagerak Kraft med omsyn til Tokedølen II sin situasjon etter ein sesong med låg vasstand i Toke.
– Nå har eg fått svar. Tokedølen II får 50 000 kroner kvart år over ei treårsperiode, altså 150 000 kroner til saman i sponsormidlar av Skagerak Kraft. Me kan også få ut alt på ein gong om me treng pengar umiddelbart, seier styreleiaren.
Han fortel at dette er utkastet til avtala, som treng ein liten finpuss før den blir sett ut i livet.
– For neste år er ønsket at det er nok vatn slik at me kjem inn til bryggene våre. Blir det lite vatn neste år også er sjølvsagt ikkje det bra, men det må me ta når den tid kjem, seier Rudlang, som ser for seg samarbeidsavtaler med andre reiselivsaktørar.
– Også håpar eg kommunen vil nytte Tokedølen II, legg han til.
Positivt bidrag i lokalmiljøet
Thor Bjørn Omnes, som er kommunikasjonssjef i Skagerak Energi stadfestar at Skagerak Kraft er i ferd med å inngå ei sponsoravtale med Tokedølen II.
– Me opplever at Tokedølen II er eit positivt bidrag i lokalmiljøet i Drangedal. Sidan me gjer slike sponsoravtaler med festivalar og idrett også, så vil me også hjelpe Tokedølen II i denne vanskelege situasjonen, seier Omnes.
Han er litt meir tilbakehalden enn Rudlang på kva partane er i dialog om.
Artikkelen fortsetter under annonsen.
– Avtala ikkje er klar ennå og at beløp og lengd på sponsoravtala ikkje er fastsett, avsluttar han.
