Gjentar suksess: Tenner julegrana på tunet i år igjen

Drangedal bygdetun gjorde suksess med julegrantenninga i fjor. Difor er den offisielle markeringa av inngangen til adventstida lagt dit i år også.

På Drangedal bygdetun er dei godt i gang med klargjeringa til årets julemarknad og julegrantenning. Til nå har 23 utstillarar meld at dei kjem, men Anne Kjendsheim, som er dagleg leiar på Drangedal bygdetun, trur fleire utstillarar står på lista hennar innan fristen går ut 18. november.

— Me fyller opp så godt som mogleg. På rekke og rad. Det er mange lokale utstillarar og dette er med på skape den rette julestemninga, seier Kjendsheim.

Nisseorkesteret kjem

Ho ønsker likevel fleire utstillarar, så om du driv med husflid, kunsthandverk, bakst eller liknande, så er du hjarteleg velkomen på bygdetunet 26. november. Bygdetunet sjølve stiller med matservering. Det blir spreidd underhalding under marknaden. Anne Gravir Klykken kjem for å synge julesongar og elevar frå Drangedal kulturskule vil opptre. Nisseorkesteret dukkar også opp.

— Me har spreidd underhaldinga litt utover marknaden og julegrantenninga, seier Kjendsheim.

Drangedal bygdetun fortsett den nye tradisjonen med å skipe den offisielle julegrantenninga. Dette blir andre gong bygdetunet tenner julegrana for drangedølane.

— Det blir gang rundt juletreet med musikk frå nisseorkesteret. Det går også rykte om at julenissen kjem, seier Kjendsheim.

Hest og kjerre

— Dette er ein fin samlingsplass for alle aldrar: Både liten og stor kan kome i julestemning, seier Kjendsheim.

Per Esborg skal ha nisseverkstad. Olav Lia stiller med hest og kjerre.

— Det hadde vore fint med eit lite snødryss natta før julemarknaden, seier Kjendsheim.

Julemarknaden og julegrantenninga er eit samarbeid mellom Drangedal bygdetun, Drangedal kommune, Drangedal sparebank, Drangedal næringsforening og Drangedal frivilligsentral.