Velkomen til Kardemomme by - her får du møte både folk og røvarar
Bare tre av dei 24 unge skodespelarane i framsyninga Folk og røvarar i Kardemomme by har stått på ei teaterscene før. Nå skal dei servere ei heilstøypt framsyning til publikum i heile seks kveldar til ende.
Alt når du sett deg i teaterstolen og ser dei forseggjorde kulissene blir du dratt inn i Torbjørn Egners verd. Når du så ser den eine skodespelaren etter den andre i kostyme som verkeleg sett prikken over i'en til rollene som blir levert med sikker røyst og prikkfri innleving.
Tobias i tårnet, tante Sofie, dei tre røvarane og alle dei andre kjende fjesa frå Kardemomme by blir tatt på kornet av dei 24 sjarmerande skodespelarane som på dagtid går i 3. — 8. klasse. Barne- og ungdomsteateret som er sett opp med seks framsyningar er meint å appellere til alle frå tre år og oppover.
Artikkelen fortsetter under annonsen.
– Av dei 24 ungane som er med, så er det bare tre som har stått på ei teaterscene framom publikum før, seier Marie Wefald engasjert og stolt. Saman med faren Håkon Wefald er ho instruktør i Drangedal musikk & teater.
Stoppa av covid
Teaterstykket som er lesta på Torbjørn Egners originalmanus var meint sett opp for eit år sidan. Men førebuingane hausten for halvanna år sidan gjekk i vasken på grunn av koronarestriksjonar. Å øve inn rollene over Teams blei ingen suksess.
– Ungane hadde fått rollene sine, men me måtte legge det på is. Då me starta opp att i haust hadde me mista mange på rollelista. Spesielt i dei største rollene. Då hadde me audition og tok inn ti nye skodespelarar, seier Wefald.
Med så mange store og krevjande roller kallar ho det reine ekstremsporten og flirer litt.
– Det blei mange nye vaksne også. Me er heilt avhengige av dei til kulisser og kostyme. Nye folk fekk opplæring i lyd og lys. I tillegg skal det bli laga mat på øving, det skal bli selt billettar og så har me kiosksal under framsyningane.
– Det er koseleg for oss vaksne å samle oss på denne måte også. Det er svært sosialt, skyt Kari Anne Voje inn.
I rollene er det ungar frå store delar av Drangedal og ikkje bare Kroken, men framsyningane skal gå føre seg på Kulturstua på Neslandsvatn.