Stor politisk usemje om minstearealet for hjort og elg

Fleirtalet i kommunestyret gjekk for å halde minstearealet for hjort og elg på 4 000 dekar dei neste tre åra.

Då kommunestyret var inne i sin femte time med debattar og vedtak kom saka om minsteareal for elg, hjort og rådyr opp. Saka som hadde fått inn enormt mange høyringssvar trass i kort høyringsfrist blei møtt av småtrøytte politikarar som såg på klokka. Likevel blei det debattert hit og dit om temaet som er svært viktig i skog- og jaktkommunen Drangedal.

4 000 mål for hjort og elg

I hovudutvalet for teknikk, landbruk og miljø blei det vedteke at minstearealet for elg blir auka til 5 000 dekar og minstearealet for hjort blir redusert til 3 000 dekar. Dette trass i at administrasjonen foreslo å halde minstearealet på 4 000 mål på både elg og hjort.

– Arbeidet med viltforvaltning er sterkt styrt av lov, forskrifter, mål og retningsliner. For meg er det viktig å følgje opp dei høyringsinnspela som kom inn. Vurderinga mi er å høyre på det dei der ute seier. Mitt forslag er å vidareføre minstearealet på 4 000 dekar, seier Hilde Kirkeby, som har handsama saka for administrasjonen.

Ho foreslår også å gjennomføre ei beitetaksering.

– Me må sjå på hjortens innverknad på elgens beite.

Ser til Kragerø

Leiar for hovudutvalet Henny Nesland sa i kommunestyremøtet torsdag kveld at det er ein tydeleg nedgang i elgstamma i kommunen.

– Difor gjekk me frå 4 000 til 5 000 dekar. Hjort er på full fart opp, så difor gjekk me frå 4 000 til 3 000 dekar. Dette blei samrøystes vedteke i hovudutvalet. Alle klagar på at det er for lite elg, då må dei endring til, sa Nesland om minstebestanden som ikkje er justert på ni år.

Ho legg ikkje skjul på at no gjerne skulle hatt eit viltutval i Drangedal kommune. I 2023 blei det felt rundt 130 elg i Drangedal. Nesland viser også til at Kragerø kommune med både mindre skog og elg har minsteareal på 5 000 på elg og 3 000 på hjort.

– I Kragerø skaut dei meir hjort enn elg i fjor. 30 elg og 38 hjort, og det er signal me må ta inn over oss.

– I høyringssvara ser eg at det er nokon reaksjonar på at det er ønskeleg å auke arealet på elg. Dette fordi då blir det somme som ikkje er store nok til å få tildelt elgkvote. Det må då vera mogleg for desse å søke seg inn i eit bestandsområde. Det er heilt umogleg å gjera alle jegerane nøgde. Det viktigaste er vel å få fram ein sunn og livskraftig elgstamme, ikkje å tilfredsstille jegerane, held Nesland fram.

Store meingingar om elg

Drangedal Ap har hatt medlemsmøte om temaet. Dei har også fått tilbakemelding på at høyringsfristen var kort. Ap, Venstre og SV er samde om at administrasjonens innstilling bilr heldt på.

– I hovudutvalet gjekk me med på å auke arealet på elg og setje det ned på hjort for å få løfta saka til kommunestyret. Det er ikkje dermed sagt at ein er samd i dette, men me ville ha debatten hit, sa Jonas Moen (Ap).

– Det er jammen godt me kan diskutere dette klokka 22.30 om kvelden. Det er vel ingen som har større meiningar om elg enn drangedølane. Men om me ser ut av kommunen så ser me at alle dei rundt slit med å fylle kvotar og dei går opp på areal. Difor synest eg det er rart om ikkje Drangedal også ser den utviklinga. Eg stemmer for hovudutvalets innstilling, sa Knut Helge Bråthen (Sp)

Ønsker seg viltnemnd og beitetaksering

Øystein Rugtveit (H) skulle ønske det var ei viltnemnd som tok seg av dette, men hadde likevel meiningar om forvaltinga.

– Det er på høg tid med beitetaksering. Det kan vera godt å finne ut av kva som skjer med elgen. 5 000 dekar per elg verkar fornuftig. Det er store mengder med hjort i visse område og det trengst avskyting, sa han og gjekk for hovudutvalets innstilling.

Dei som stemde for hovudutvalets innstilling og ville endre minstearealet, men kom i mindretal var: Anne Henriette Straume (Sp), Arnt Roar Kåsa (Frp), Dag Arild Brødsjømoen (Frp), Halvor Olsen (Sp), Henny Nesland (Frp), Knut Helge Bråthen (Sp), Trygve Kollane (Ap), Øyvind Birger Løyte (Felleslista for Høgre og Venstre) og Øystein Rugtveit (Felleslista for Høgre og Venstre).