Meir pengar til miljøtiltak i landbruket
No er det på tide å søke om støtte dersom du har gjennomført eit miljøtiltak på garden i 2022. Landbruksdirektoratet har 786 millionar dei skal dele ut.
Potten for regionale miljøtilskot er auka med 30 prosent frå i fjor, og direktoratet ser at fleire bønder gjennomfører gode miljøtiltak på garden. Tilskotet blir utbetalt etterskotsvis, og søknadsfristen er 15. oktober. Men fristen er også ei viktig påminning om å starte planlegginga for neste år, skriv Landbruksdirektoratet.
Tiltak som tradisjonelt har hatt størst tilslutning er å redusere avrenning til vatn og utslepp til luft, og skjøtsel av kulturlandskap.
Artikkelen fortsetter under annonsen.
– Vi veit at det finst gardbrukarar som gjennomfører miljøtiltak også utan å vite om tilskotet, seier rådgivar Ina Kristine Talmo i Landbruksdirektoratet. For andre igjen vil det vere mindre aktuelt, sidan tilskota er skreddarsydde for ulike regionale miljøutfordringar.
Det er no prioritert å redusere påverkinga landbruket har på Oslofjorden, og fylka rundt fjorden får ein større del av pengane. Innlandet og Trøndelag er andre område der store summar skal fordelast, deretter følgjer Vestland.
(©NPK)