Ikkje nøgde med dagens veterinærordning

Interesseorganisasjonane for bøndene med produksjonsdyr i Drangedal ser ikkje lyst på veterinærtilgangen i kommunen.

I fjor haust skreiv Drangedalsposten om mjølkebønder som meinte at tilgangen på rask nok veterinærhjelp til produksjonsdyr ikkje var god nok i Drangedal. Nå, over eit halvt år etter, har ingenting forandra seg. Veterinærtilgangen er den same.

– Me har lyst ut vaktordninga for veterinær, som er felles for Drangedal og Kragerø, to gonger sidan august i fjor. Ingen har søkt, seier jordbrukskonsulent i Drangedal kommune Pål Henne.

– Dekker for stort område

Det er ei kjend sak at medlemmene i Vestmar sau og geit ikkje er nøgde med veterinærordninga som dei har tilgang på.

– Veterinærvakta som me har til disposisjon dekker eit for stort område då det strekk seg frå Jomfruland til Tørdal øvst i Drangedal, seier leiar i Vestmar sau og geit Terje Gautefall.

Drangedal kommune er pliktig til å lage ei ordning som dekker døgnet med veterinær frå klokka 16.00 til 08.00.

– På dagtid er den enkelte bonde overlate til seg sjølv og må prøve å få tak i ein veterinær, som naturlegvis har det daglege arbeidet sitt med avtalt arbeid, seier Gautefall.

– Situasjonen me nå har kome i tener ingen og har sine grunner, men den er ikkje eigna i media. Me har dessutan i mange år vore bortskjemd til dei grader då me har hatt tilgang på veterinær Elisabeth A. Kaasa, som diverre har redusert sitt arbeid som veterinær, legg han til.

Svært dårleg på dagtid

Thor Olav S. Holte, som er leiar for Tørdal og Drangedal bondelag, teiknar same bilde.

– Me har svært dårleg veterinærdekning på dagtid. Det er ein utfordrande situasjon. Det er færre veterinærar som kan behandle produksjonsdyr nå enn tidlegare, seier han.

Holte trur det kan koma av at området veterinæren skal dekke er så stort. Noko som eventuelt er støtta opp av at ingen veterinærar har søkt vaktutlysingane for Drangedal og Kragerø.

– Drangedal i tillegg til Kragerø med skjergard er eit stort område. Det kan også hende veterinærane ser betre økonomi i smådyr enn produksjonsdyr. Det burde vore ei veterinærvakt på dagtid i området. Bonden kan risikere å vente lenge. Då kan det stå om livet til dyra.

Skulle ønske han kunne trylle

Jordbrukskonsulent Henne fortel at kommunen framleis slit med å få til ønskeleg veterinærdekning med ei fullt bemanna vaktordning.

– Ei tredelt vaktordning, slik me har i dag, blir ei tøff belasting for tre veterinærar. Bøndene i Drangedal får hjelp frå Midt-Telemark og Seljord.

Det er landbruksdirektoratet som har bestemd at veterinærordninga skal delast på av Drangedal og Kragerø. Henne fortel at det er ein krevjande situasjon.

– Hadde eg kunne trylle, så hadde eg vore glad for det. Drangedal kommune gjer det me kan for å vera innanfor lovkrava. Me burde fått inn søknadar til vaktordninga. Eg registrerer at me ikkje har får inn søknadar og det seier sitt om situasjonen.